Hüt morge bini wiedermol mit de undetstützig vom wecker ufgstande. Han vo de mica de tipp übercho(danke vilmol), i mös unbedingt dur d’stockholmer schäre (e einzigartigi inslelandschaft) fahre und uf eini vo dene insle. So hät si mer e entsprechendi route usegsuecht und i han mi mitem schiff uf de weg noch sanfhamn gmacht. Die insle isch wie d’titelsitw vome reiseprospekt gsi. Wunderschöni hüser, kei autos,wälder,… . I han den e chlini rundi uf de insle trült und bin mitem schiff (zügelundernehme, tiertransport und passagierschiff) wieder zrugg uf stockholm.

Ufem Rückweg bini nomel schnell a de triathlonstrecki verbi. Hüt isch de teamwettkampf ufem programm gstande,ganz e spannendi wettkampfform. Han gad no di letschte zwei athlete pro team gseh…resp. fast. Han bi de letschte läufer möse go understoh, will de rege plötzli zimli intensiv worde isch.
Morn gohts den weg vo stockholm, wo ane weissi aber nonig.

Erkenntnis des Tages:
Schwizer triathlete sind eifach kei läufer…

De hütig tag isch ganz im zeiche vom königsschloss gstande (okay, zumindest de erst teil). So simer d’schatzchammere, di königliche rüm, s’museum und als zückerli no d’wachablösig go luege. D’wachablösig hät klar am meiste idruck gmacht…en moment lang hani sogar schiss gha, die tamboure chöted im hoftambour vom tv no konkurenz mache! (ganz häts den aber doch nöd glanget, si händ nöd allei es festzelt zum rocke brocht!)

Nochher is uf e chlini haferundfahrt gangä, zum stockholm mol no us dere sicht z’gseh, und is kafi…gad nebed em interviewplatz mit dere, wo am olympische triathlon en halbe milimeter z’langsam gsi isch.
Am obig hät üs e schwedin chli i d’sitte und gebrüch vo schwede, stockholm und em schwedische damehockey igfüährt. So häts under anderem en schwedische chrebs gäh (inkl. entsprechende erklärige) und en drink i de hilton bar mit super ussicht über d’stadt.

Erkenntnis des Tages 1:
D’arbet so en chrebs knacke stoht i keim verhältnis zum essbare ertrag!

Erkenntnis des Tages 2:
Falls mer sis u-bahnticket nüm findt, söt mer ersatz am kiosk chaufe und nöd am schalter…danke für de tipp nette herr vom schalter!

Erkenntnis des Tages 3:
Z’schwede chas anschinend ganz normal si, dass es chind zwei mamis hät…

Nocheme usgibige zmorge (inkl. härtem 3min-ei), häts gheisse campingplatz verloh! Uf dem chline herzige plätzli zälted i de nöchste täg 3000lüt…kei ahnig wie da söt goh!
Mir händ üs den entschide uf stockholm witerz’zieh. Dank em navi eimol quer dure, womit mer s’wichtigst den au scho fast gseh häted!:-)
Nochem installiere ufem campingplatz is es erst mol i d’city gangä. Zum…d’ichaufsstross uskundschafte!!!(de gross underschied wänn mitere frau underwegs bisch!!!)
Zum znacht ischs is rock kafi gangä, bevor mer den langsam zrugg grollt sind. (Bstelled nie im rock kafi no nachos zur vorspies!!)

Erkenntnis des Tages:
Meh chan en städteschriftzug uf alles möglichi und unmöglichi druftue… und d’lüt chaufeds!

Buchrückmeldung 1 an Pädi:
„Aber ich bin der beste von allen.“
(Hans der also relativ eifach gmacht…)

Nochere nacht uf de inslä gräsö ischs hüt morge mitem velo as erkunde vo de insle gangä…so wärs mol plant gsi (han jo bsuech,also werded au wieder bitz plän für mi gmacht…):-) s’velo isch den au würkli debi gsi, aber immerno ufem veloträger und es isch im wetter z’lieb mitem auto los gangä. Defür uf di gross tour ganz in norde.

Nochdems mit de fähre wieder zrugg ufs festland gangä isch, simer de küste noh wieder südlich uf norrtälje. Immer en blick richtig wiese und felder, händ doch üsi nochbere vo letscht nacht am tag vorher drü elch gseh… und den tatsächlich i de witi es tier vo chöt en elch si! Sicher bimer immer nonig ganz…i behaupts jetzt eifach mol!:-)

Nochem stopp in norrtälje (ganz en herzig ort) ischs zum hütige etapeort uf vaxholm gangä womer üs mitem esse us de heimat probiered…zürigschnetzlets!

Bild des Tages:

Öb do d’schwizerpöstler echt no drus chämed? (Echt en grund wieso gwüssi postagstellti zu de bank gwechslet händ?):-)

Hüt morge ischs früä losgangä zum pünktlich in stockholm min gascht go abhole. So bini au pünktlich in stockholm am flughafe gstande, aber dä flughafe hät chli chlini flüger gha für e hauptstadt…guet, mol en blick uf d’chartä und do gits tatsächlich usserhalb stockholm (eigetli eher in uppsala):-)  nomel en flughafe!*uppsala* so hani den gisela mit bitz verspötig in alanda ufglade.
Di erst station vom tag isch den au gad uppssla gsi mitem grosse dom unden grab vom könig gustav vasa, wo in schwede glaub alles plant und baue hät.

Noch dem is richtig küste gangä. Z’erst miteme chline stopp in östhamer, bevors mit de fähre (zur abwechslig mol was gratis i dem susch eher türe land) uf de zeltplatz vo gräsö gangä isch.

Erkenntnis des Tages: In stockholm isch nöd gleich in stockholm

Hüt morge is z’erst wiedermol inne chilä gangä… i di ältist chlosterchilä vo schwede (do isch alles irgedwie am ältiste oder grösste! Wart nur no bisi s’ältist schaukelpferd gseh.):-) die isch gad a mim übernachtigsort gsi,drum han mer si nöd entgoh lo.
Aschlüssend hani mi uf de weg uf kolmarden gmacht und den da…

I bin in tierpark und han so en sunnige, agnehme tag gnosse. Bin a de delfinshow gsi (do dörfeds da no und i han mi au nöd dur dütschi tierschützer möse kämpfä) und han e seilbahnsafari (miteme schwizer bähnli) gmacht.

D’nacht verbringi in svantsjö ufere insle churz vor stockholm, ufem schlossparkplatz. Stockholm darum, do morn min nöchste bsuech in stockholm landet.

Erkenntnis des Tages eines achterbahnfahrenden Vaters: meh söt s’natel headset vor de fahrt abzieh…

Losgange is hüt morge miteme grüsch ufem dach woni bis jetzt nonig ghört ha…räge! I han den de moment gnutzt, zum bitz länger ligebliebe und no z’läse. (Danke päddy für all die büächer) irgedwänn hani mi den ufgrafft zume gheimtipp vo de jasmin und em andrea: d’chile vo habo! Isch würkli e schöni chile, bsunders die verziehrige im innere und de chli engel wo d’stunde schloht.

De rest vom tag isch den ganz im zeiche vom göta-kanal gstande. Da isch s’gröst bauwerk vo schwede.
Z’erst bini uf motala. Det isch aber gad nöd vil gloffä. Aschlüssend witer uf borensberg, det sinds gad am schleusse gsi. Isch eini vo de einzige schleusse wo no vo hand göffnet, resp. gschlosse wird. Und zum schluss sind no die 11 schleuse vo berg ufem programm gstande (allei 7 hinderenand, wo über 18m überwinded).

Zum abschluss vom tag bini no uf linköping, wos gheise hät es sei gad en wikingermarkt…naja, es märktli isch gsi.
Dos kei möglichkeite zum übernachte gäh hät bini den wieder zrugg uf berg.

Unterschied des Tages: bim lorin in london sind di hübsche fraue touristinne…