Los gangä ischs hüt morge no uf de vordersitä. Z’erst hani en abstecher uf nusnäs gmacht. Ganz en chline ort, doch jede in schwede kennt  s’hauptprodukt us dem dorf, s’dalapferdli. Da chline,meist roti rösli us holz. Meh hät chöne zueluege wies die rösslu mached und natürli i allne variatione postä.
Witer uf mim weg nordwärts is ufem inlandsvägen gangä, anere total 1700km lange stross. Für mi häts somit gheisse en erste augeschi näh wa den no so uf mi zuechunt: langi strosse, vil wald, wenig zivilisation…und da no im eher besiedlete mittelschwede. Jetzt häts au gheisse chartä chehre…es goht ab sofort uf de rücksitä, imme no chlinere massstab witer –> i bi nonig mol i de hälfti vo schwede!

I hans hüt ganz gmüätlich gno, han underwegs mol e pause gmacht ame see zum chli läsä (bisi vo so komische flugameise agfalle worde bi) und han früäner gstoppt als mer mol vorgno ha und mi entschide zum de morgig tag mitere wanderig z’starte. D’nacht verbringi daher in hede, scho recht nöch a de norwegische grenze. (Für mi gohts den aber z’erst nomel i di ander richtig).

Ort des Tages:
Mora: s’ziel vom wasalauf, em grösste langlaufrenne vo de welt. Momentan aber kein grund zum mini langlaufkarriere reaktiviere…

Nocheme chline morgespaziergang is los ganga richtig falun. Han mer lang überleit, öbi de abstecher söll mache oder nöd…zum glück hanen gmacht! In falun isch fast sid urzite erz und anderi metal abbaue worde.
De stolle chan nur im rahme vonere füährig bsuecht werde, so hani mi scho uf e witeri englischlektion igstellt, bi den aber überrascht gsi, wos gheisse hät es gäb au e füährig uf dütsch. Mit mänteli und helm bekleidet is den z’fuess abe in stolle bis uf 67m vo total über 400m!
Underwegs häts diversi werkzüg, maschine und irichtige z’gseh gäh wo zum teil scho fast 400 jöhrig sind, do i somene stolle d’sache sich nöd z’ersetzed.

Bime isturz im 17.johrhundert hät d’gruebe die form übercho.

Im Aschluss isches witergangä uf rättvik an siljansee. In rättvik isch insbrsondere d’chile, resp. die chline hüttli rund um d’chile sehenswert. Die händs früäner brucht, dass em samstigobig scho händ chöne areise, damits am suntig pünktlich i de chile gsi sind.

Aschlüssend is chli witer em see entlang gangä zum d’region gnüsse und es plätzli für d’nacht z’finde. Glandet bini am schluss ime wald i de nöchi vo siljansnäs, i de hoffnig es paar tier z’gseh. Doch leider is go regne cho und i han den mini beobachtige is trochne verleit und mi em buech gwittmet.

Erkenntnis des Tages:
Obwohl d’lüt in falun durschnittlich chli älter worde sind, isch so en ort glaub nöd de gsündist. Oder isch da e guets zeiche, wänns de erst grasshalm erst i 2.5km entfernig git und d’luft so zämägsetzt isch, dass nödmol pest do hie cho isch?

Jetzt häts endgültig gheisse stockholm z’verloh. Es gäb no sovil z’gseh i dere stadt, doch irgedwenn sötti jo doch emol am nordkap acho.
Hüt is zwor z’erst mol nöd i di seb richtig, sondern neh südlich und westlich gangä. I han im verbifahre no im schloss drottningholm en bsuech abgstattet. Da isch de eigetlich wohnsitz vom könig und sinere familie, so isch nöd ganz alles frei zuegänglich. Per zuefall hanis so troffe, dass wiederum gad e wachablösig stattgfunde hät. Bsunders idrücklich isch de gross park gsi mit all dene gärte. Under anderem häts en chinesische garte miteme vogelhus…

…man beachte d’vögel!

Noch drottningholm hani uf minere reis um de märlasee no im schloss gripsholm en bsuech abgstattet. Woni det acho bi, is gad mitere englische füährig (di meiste vo de gruppe sind zwor dütsch sprechend gsi) los gangä. Schloss gripsholm isch nebed emene interessante bauwerk au no d’portraitsammlig (usstellig) vom köningshus. So isch d’füährig i erster linie vorallem au e lektion i schwedischer gschicht gsi (z.b. was gmacht händ wenn en thronfolger gfählt hät…).

Zum abschluss vom tag is witer uf västerås. Noch de besichtigung vo paar grabhügel und steischiff, han mer für d’nacht es plätzli ufere chline insle gsuecht.

Erkenntnis des Tages:
Scho könige händ pschisse wos nur gangä isch (halt politiker). Hät ne es portrait vo öberm gfählt wos gern gha häted, hät mer eifach es anders bild gno und de name womer gern gha hät dezue gschribe…

Hüt Morge is chli gmüätlicher los gangä. Noch eme bsuech vom campingstrand und emene liecht vorzogene mittagsässe is richtig u-bahn station gangä (und den isch en weniger gmüätliche teil cho; han nomel möse zrugg zum camper renne…als resultat devo hani jetzt e blottere):-)
I de innestadt hani mi den vo mim bsuech möse verabschide (danke vilmol fürs verbieluge…falls no öber andersch lust uf e bsüächli hät, han meistens 2-3 better frei.)
Für mi is den richtig schloss gangä zum triathlon. Noch dem i bim start vom schwimme no en platz i de 5. oder 6. reihe gha han, han mer aschlüssend ein vo de wohl begehrtischte plätz i de 1. reihe gsicheret. Bin i de wechselzone gstande, am platz vom sven riedere (bis jetzt ischer nonig so begehrt gsi). Im damerenne isch da den aber zum wechselplatz vo de lisa norden worde (si wo a de olympische spiel en tusigstel z’langsam gsi isch). Jetzt häted glaub ali schwede gern mit mir tuscht…uf jedem fall sind immer wieder fotiapparät über mini ling oder recht schultere gstreckt worde…und mitte drin ich mit de schwizerfahne!:-) Do d’lisa den au gwunne hät (d’nicola spirig hät leider uf de start verzichtet), isch au d’stimmig super gsi.



Am obig is nomel bitz dur d’stadt gangä, es paar neui plätzli go entdecke.

Erkenntnis des Tages:
Wer kein chopf hät, hät bei!

Nocheme 3min – Ei (hüt isch da vo gescht kompensiert worde…im schnitt wäreds zwei perfekti 3min- eier gsi):-), isch hüt s’programm noch de wetterprognose gstaltet worde. So isch als ersts is vasamuseum gangä. Scho bim innecho hät mer gseh wieso da schiff vor über 350 hät möse sinkä…e tüfi wasserlinie und en riesige teil usserhalb vom wasser. Währed de füährig sind den no ganz anderi sache zum vorschi cho, wo nöd so optimal gsi sind. (Z.b. isch di eint site vo schwedische bootsbauer gmacht worde und di ander vo holländisch…nur isch ein zoll nöd bi beidne glichlang gsi,womit di eint sitä grösser als di ander worde isch!)

Noch dem usgedehnte ufenthalt is witer is aquarium gangä, so e art sea life, chli go fisch bestuhne. Au de ufenthalt isch chli usdehnt worde, dos churz vorem verlo en platzrege gäh hät und warte agseit gsi isch. So en rege sind sich anschinend nöd mol d’schwede gwöhnt, hät doch s’tram weg däm ca. 20min möse warte bis d’strecki wieder frei gsi isch.

Am obig isch no chli shope (han möse feststelle, dass min laptop z’neu isch für d’schwede) und znachtässä agseit gsi.

Hoffnung des Tages:
Das üsi flugzügingenieure (bsunders die wo sich de halb tag mit ässä beschäftiged) nöd so böck schüssed wie ihri schwedische kollege us de bootsbaubranche.

Bilder des Tages:


Finde den unterschied…