Si hät mer also nöd schlecht gfollgt hüt.Rundume häsch immer chli rege gseh, aber i bin ganz troche dure cho. Und so wie d’wise und bäch zum teil usgsehnd, sinds froh gsi, bini dure cho und s’hät wenigstens mol en moment ufghört regne.
Losgangä ischs hüt morge miteme fraueprogrammpunkt…i bin in ullared (e chlises kaff) im grösste ichaufszentrum vo nordeuropa gsi. Isch würkli riesig gsi und i han glaub nöd alles gseh…aber es hät alles nötige und au sehr, sehr vil unnötigs gäh.
Bin den relativ schnell witer und de küste no südwärts. In mölle hani de landzunge kullen en bsuech abgstattet. Es schös naturschutzgebiet…mit golfplatz.

De nomittag hani in helsingborg verbrocht, vo wo us es morn mit de fähre witergoht uf helsingør in dänemark. Die stadt hät mer wieder besser gfalle.:-)

Frage des Tages:
Hät mis schwedisch echt glanget zum s’richtig fährticket löse? Wo landi echt?

Im lauf vom hütige tag isch halbzit uf minere reis gsi…fallsi mi nöd verzellt han!:-) Juhui!!! I han nomel gnau so vil zit zum nomel sovil spannendi, interessanti und schöni ort z’gseh!
Hüt morge is losgangä miteme spaziergang durs freiluft flösser- und waldarbeitermuseum wo sich gad nebed mim übernachtigsort befunde hät. Bsunders die underschiedliche hüttene und lebensarte sind interessant gsi.
Knapp 100km witer hät sich den mini nöchst station befunde, jokkmokk. Bevor i jedoch in jokkmokk acho bin, is churz vorher no über de polarkreis gangä…hät chli gholperet und nebed de stross so en steihufe gha…

In jokkmokk den endli acho, bini is samemuseum. Wie de werni scho akündt hät, ischs würkli ganz es guets museum, wo vil über s’volk vo de same und s’läbä do in lappland zeigt.

Nochher hani mi entschide d’e45 wieder z’verloh und en abstecher uf kvikkjokk z’mache. Da isch en chline ort, ca 100km vo jokkmokk entfernt, und ghört zu laponia, de region do wo es unesco- weltkulturerbe isch. Vo do us chamer zu mehrtägigetoure in nationalpark starte oder eifach wie ich morn vor han, en gipfel inere tagestour bezwinge.
Die nacht verbringi wieder ufeme parkplatz nebed stromschnelle, no nöcher und no lüter!:-)

Erkenntnis des Tages:
Söll ni meh ein i de schwiz s’gfühl ha er wohn am a… vo de welt! Da chan gar nüt si gege da do…130km bis es wenigstens es paar wenigi läde fürs nötigst und e tankstell hät!

Han mer hüt morge zit loh mit zämäpacke und de camper uf voderma bringe. Womer den igfalle isch wa für en strenge und intensive tag ich dihom gha hät erst recht!:-)
Wos den endli losgangä isch, isch mis erste tagesziel arvidsjaur guet 350km entfernt gsi. Han underwägs aber diversi chürzeri zwüschestopps gmacht, under anderem wege dem…

han plötzli nebed de stross zwei elch entdeckt. Bisi aber kehrt, parkiert und anneglobbe bin, sinds weg gsi. Bin scho ufem rückweg zum auto gsi, wos wieder usem wald uftaucht sind.
In arvidsjaur acho bini es paar alti holzhüttene go aluege. Die bruched d’same hüt no für ihren grosse versammligfiertig. Zum de mitz’erlebe bini leider gad e wuche z’spot dra gsi.

Den bini mim vorhabe direkt uf de e45 richtig nordkap es ersts mol abcho. Han en abstecher zu de storfose gmacht. Das sind riesigi stromschnelle, ame fluss wos bis vor churzem no baumstämm gflösst händ. Ufem weg do anne, bini no diverse rentier begegnet, s’erste woni gseh han isch knapp 5m nebed em auto stohbliebe.

Bide storfose verbringi au mini nacht…hoff chan bi dem rusche guet schloffä!:-)

Erkenntnis des Tages:
Es git in schwede sogar dütsches radioprogramm…aber nur all zwei wuche e halbstund!:-)

Noch dem i mi hüt morge us de decki usgrabe han is relativ schnell druf losgangä. Für zmorge oder no gross si ischs eifach z’chalt gsi!:-)
I han mi uf de weg richtig östersund gmacht. So is z’erst über e stund zrugg uf d’e45 (inlandsvägen) gangä, womer ca. 5autos begegnet sind.:-) In östersund acho hani gad als ersts en bsuech im biathlonstadion gmacht. Si sind gad vorbereitige am treffe gsi und es paar athlete sind mit de rollschi am trainiere gsi. Es grosses highlight im stadion, isch de technik- und restaurantturm.

Uf en plante bsuech i de innestadt hani verzichtet, do de städteplaner parkplätz vergesse hät. Defür isch en grossichauf ufem programm gstandä, dörfts doch für längeri zit de letscht gross lade gsi si.
Han mi den definitiv entschide uf min abstecher richtig botmische meerbuse (umeå und luleå)z’verzichte und meh oder weniger uf de inlandsvägen z’bliebe.So bini no es stuck witer nordwärts bis uf strömsund, woni wiedermol en camping ufgsuecht han für en vollservice.
Als obigprogramm isch us mim chline velousflug is städtli schlussendli e ca. 30km velotour worde. Han en wegwieser zu runezeichnige endteckt, woni gfolgt bi unds schlussendli aber nöd bereut han.

Erkenntnis des Tages:
En wanderwegwiser chan under umständ in schwede heisse: i die richtig, kämpf di selber durs gebüsch…

Hüt isch bi mir de sånfjället nationalpark ufem programm gstande. Noch mim schlaue buech, söts do nur so vo bäre wimmle und hinder jedem gebüsch ein ha (oder so). Mini hoffnige eine z’gseh sind aber scho ufem parkplatz ufes minimum gsunke…i han det de werni gseh. De werni isch en pensionierte winterthurer wo sidem ’75gi scho mind. 45mol in schwede gsi isch und no nie ein gseh hät. Er hät mer defür susch no es paar tipps gäh mit sache woni chöt aluege und mir gad di nöchste hoffnige no chli „minimiert“, i mös mol luege wie wit in norde i no chäm um die zit. (Sid gescht sinds übrigens wie wild am schneepföhli setze)
I han den glich e chlini wanderig gmacht (bi recht windige verhältnis und uf de letschte meter sogar no mit rege), jedoch ussert es paar vögel hani nüt gseh. Aber allei für de usblick häts sich scho glohnt.

Woni zrugg bim auto gsi bi isch de werni au no ufem parkplatz gsi (bi dem wetter chäg mer eh nöd vil mache) und hät mer den min witere tagesverlauf unbewust plant. So bini als nöchsts no witer richtig norwege gfahre, zumen meteoriteischlag. Han mit irged emene seeli grechnet womer mit vil phantasie merkt wa do mol gsi isch, bin den überrascht gsi, wie guet mer da erkennt.

Witer wer plant gsi zum über di höchst stross vo schwede z’fahre, si isch stolzi 975m.ü.M.. Do mir de werni verzellt hät er sei vier nächt do gsi und hei jede obig bsuech vonere fuchsart gha wo vom ussterbe bedroht isch, hani mi entschide zum au e nacht do z’verbringe…doch hüt obig chöts im fuchs guet z’stürmisch, z’nass und z’chalt si.
Hanen gseh! Er isch uftaucht!!!🙂

Erkenntnis des Tages:
Söted es paar dütschi behaupte si heied bäre gseh, bindeds eim vilicht au en bär uf…sind bäre doch einzelgänger!