De hütige tag hät sehr monoton agfangä „blop blop blop…“ eifach gschwindigkeit hät hin und wieder bitz gänderet. So hani de morge mit läsä und autofahre verbrocht. I bin uf d’insle senja gfahre, woni eigetli mol plant han zum go wandere hüt.

Vo det us hani mit de fähre richtig lofote welle…aber ebe, nur welle! Di fahrt aber sidem 31.august nüm! Also isch wiedermol rundumefahre agseit gsi. Im lauf vom nomittag is den no zimli guet worde und i han denkt i machi wenigstens no en chline spaziergang…doch gad am afang isch de weg no so under wasser gstande,das is den glich bliebe lo han und mini fahrt rundume fortgsetzt han.

Geg de obig hani den no en churze abstecher uf narvik gmacht. Doch de reisefüährer hät meh versproche… So hani den d’nacht i de nöchi vo nygård verbrocht.

Mitleid des Tages:
Als öbs mitem frostige winter nöd scho gnueg gstroft wäred…si mönd do i de region au no es zh uf de autonummere ha!

Do tromsø scho immer en wichtige hafe gsi isch im norde, sind vo do us unzähligi expeditione oder jäger und fischer i d’arktis gstartet. Doher bini hüt als ersts s’museum polaris go bsueche. Es spannends museum, mit guete filmbiträg und diverse fisch und es paar seehünd usem norde.

Als nöchsts hani im Polarmuseum en bsuech abgstattet. Det is würkli vorallem um di erste jäger gangä wo im norde underwägs gsi sind und den au no um de roald amundsen und anderi forscher und abentürer wo sich i de polarregione ufghalte händ.

Im schöne wetter z’lieb hani den no chli zit im städtli vo tromsø verbrocht, bevori an strand vo sommarøy gfahre bin. En wunderschöne sandstrand und türkis farbigs wasser…chöt au uf de maledive oder so si!:-)

Vo det us hani den eigetli mit de fähre uf d’insle senja welle übersetze (knapp 10km). Doch die fahrt momentan nöd und so gits halt fast 200 km im auto.
En teil hani mol hüt no gmacht, de rest folgt halt morn…

Hoffnung des Tages:
Das mir d’fähre und d’fährverbindige i zuekunft besser gstimmt sind!

Hüt morge häts wiedermol e einigermasse erträglichi temperatur bim zmorgeässä gha. Obwohl mer nöd ganz sicher gsi bi öb de schnee gescht obig scho uf dene berggipfel rundume gsi isch! De hütige tag hani vorallem mit auto fahre und d’landschaft gnüsse verbrocht.

Zweimol hani au es stuck uf de fähre zrugg gleit. Bim erste mol, vo olderdalen uf lyngseidet, hani si aber gad gseh abfahre und doher nochher über e stund möse warte…! In lyngseidet, bini mite i de lyngen-alpe gsi. Hät würkli erstundlichi ähnlichkeite mit üsne alpe. Nochdem i au no mit de fähre vo svensby uf breivikeidet übergsetzt gha han, is nüm wit gsi bis uf tromsø, mim hütige tagesziel. I han mer den mol en erste idruck vom städtli verschafft und han i de nöchi vo futrikelv es plätzli für d’nacht gfunde.

Erkenntnis des Tages: Wie üsi alpe…nur mit ganz vil birke (gstrüp)!

Hüt Morge hät mi s’nordkap glich verabschidet, wies mi begrüässt hät….

Vom Nordkap us ischs den z’erst mol uf hammerfest gangä, de angeblich nördlichste stadt. Das det 18’000 lüt sölled läbä würd mer aber fast nöd glaube.
Vo hammerfest is wieder richtig süde gangä zu mim eigetliche tagesziel, uf alta. Eigetli hani de bsuech im museum mit de grösste felsemolereie nördlich vo de alpe uf de mäntig plant gha, do i aber bitz früäner det gsi bi und mer de usebereich au nochher no hät chöne aluege bini glich hüt scho gangä. Sind insgesamt so öbe a di 6000 zeichnige wos per zuefall i de 80er johr entdeckt händ und zum teil über 6000 johr alt sind. I han zwor meistens nöd s’gliche chöne düte wie d’beschribige dezue, aber es isch interessant gsi.

D’nacht verbringi bitz usserhalb vo alta bi eidsens. Han bi de wahl vo mim platz, wiedermol en ruschende wasserfall als nochber gwählt!:-)

Auftrag des Tages:
Lönd euri chind es paar stei mole und vergrabeds…i paar 1000 johr gits den vilicht au es unesco-weltkulturerbe drus!

Hmm…sölli? Sölli nöd? Wa macht s’wetter? Hebeds? Regnets? Chunts no meh go winde? – mit dene froge hani mi hüt morge umegschlage! Es isch drum gangä, öbi söll uf knivskjelodden laufe oder nöd. Da isch de aller nördlichst punkt, no bitz witer im norde als nordkap, jedoch nur über en 9km lange wanderweg erreichbar.
Nochdem am 12i nomel e ladig rege abecho isch, de wetterbricht uf de nomittag aber eher besser gha hät, hani mi den entschide zum glich z’goh.
Zum guete glück! Eigetli chani da jedem nur empfehle, gseht mer so doch au vil meh vom nordkap als wänn mer drufobe isch!:-)

Am üsserste punkt acho, hani mi uf e hütte oder öbis gfreut, zum mi chli gschützt vorem wind z’erhole…aber nix war. Ussert es gästebuech und e statue gits det nüt!

Woni zrugg gsi bin, hani mi den entschide zum glich nonig e etape witer z’fahre, sondern nomel e nacht ufem parkplatz vom nordkap z’verbringe und erst morn witer z’goh!

Fiesheit des Tages:
Wänn de wind währed de wanderig so chehrt, dass mer immer gegewind hät!

Hüt häts klappt! Bin an nordkap gsi und mer hät sogar was gseh!:-) Isch e schöni,idrücklichi landschaft do (findsch aber au a vil andere ort) …de itrittspris isch eifach am name entsprechend!
Nochdem mer alles agluegt han und de best (windgschützt) parkplatz gsicheret han, han mer am obig mis wohlverdienti fondue kocht!:-)

Erkenntnis des Tages:
D’landzunge nebed dra isch eigetli nördlicher…

Nochere stürmische nacht und mehrere mol drum bange dass nöd gad min camper wegwindet, hani den am morge (ca am halb 8gi, isch aber scho vor 4stund hell gsi) s’gfühl gha i suech mer mol es windstillers plätzli. Han den möse feststelle, dass die 4 camper wo am obig no i minere nöchi gstande sind ali scho wegwindet hät…oder nöd sovil geduld gha händ! Bin den mol chli uf de insle umegfahre bis vorem mittag, und han mer alles chli agluegt.

E windstills plätzli gits do anschinend nöd, aber wenigstens hani eis mit bitz weniger wind gfunde. Dos de rest vom tag nur gwindet und gregnet hät, hanen hauptsächlich mit lese verbrocht…han denkt noch dene strenge letschte täg mit sovil fahre darfs au mol chli en ruhigere si. Morn hoffi jetzt mol uf bessers wetter zum am nordkap au mol wenigstens bitz was z’gseh.

Distanz des Tages:
Lut google maps bini jetzt 3532km vo dihei entfernt und wär i eim tag und 20std dihei. Fürs navi isches z’wit…:-)