Kiruna isch jo vorallem weg sim erzabbau bekannt und so gross, da hani mir hüt mol chli gnäuer welle go aluege. So bini is tourismusbüro…da hät aber nur vom 2 bis am 4i offe gha! Han den aber es plakat gseh, dass mer s’ticket e online söll bueche. Da hani den gmacht (kiruna hät e erstundlich guets offes wlan-netz) mit de bemerkig, si gebed mir am 12i bscheid öbs stattfindet oder nöd. I de zwüschezit bini den no chli i d’umgebig vo kiruna gfahre und han elch nummer 4 gseh.
Am 12i isch den leider d’füährig abgseit worde und i han mi uf de weg richtig nordkap chöne mache…!

Isch en guete tag gsi zum autofahre, häts doch de ganz tag nur gregnet und isch chalt gsi. (Han den no elch nr. 5 gseh ca. 5m nebed de stross…).
D’nacht verbringi zwüsched leppäjärvi/leaibejávri und palojärvi/bálojávri in finland. Demiti au da erlebniss mol no gha han! Über grenze bini übrigens in karesuando/gárasavvon/kaaresuvanto. (Und vor jedem ort häts darum 2-3 ortsschilder mit allne näme…)

Erkenntnis des Tages:
S’abwäsche goht au z’finnland nöd über e stund…meh söt eifach zweimol uf di glich uhr luege! (Und nöd bim zweitemol ufs natel wo sich automatisch ufs land istellt)

Baustelle des Tages:
Uf de e45 (verglichbar mitere autostross bi üs): 25km lang, zum teil isch mer uf neuem belag gfahre, zum teil ufem neue chieskoffer (häsch d’walze no möse überhole), z.t. ufem alte oder usbaute chieskoffer mit schlaglöcher und z.t. hinderemene lotse,wi si dur dure gfüährt hät. Und wieso mir währed de lehr immer uf de wetterbricht gluegt händ und uf paar schöni,warmi täg gwartet händ weissi au nüm sid hüt! Die händ bi 8grad und räge belag ibaue!!!