Hüt isch nur no d’heimreis ufem programm gstandä. Somit isch bereits am 10ab 4i tagwach gsi und am halb 5i simer vo zwei taxis abgholt worde, dos um die zit no kei anderi möglichkeit gäh hät zum zum flughafe z’glange. E uhrzit wo im sascha sin wecker no nie gseh hät…drum hät er üs den au hüt morge zum schlof use ghuestet.
Nochem verabschide z’altstätte simer vom chauffer wieder heigfahre worde…damol hät s’ablade noch plan funktioniert!;-)

Dank des Tages:
A ali wo debi gsi sind für di tolle täg und bsunders a d’familie vetsch fürs organisiere!

Am 1.jäner isch vorallem z’erst usschlofä agseit gsi. Also zumindest für di meiste…bi mir is bitz früähner gsi. Nochem gewuschel bim zmorgeässe (di händ glaub i jedes zimmer nomel es bett inegstellt) hani mi is uno-quartier und in donaupark begäh. Uf en bsuech ufem donauturm hani aber verzichtet, do s’wetter nöd sehr sichtig gsi isch.

Aschlüssend hani mi miteme grüppli bim hundertwasserhus troffä und s’zweit grüppli isch is uno-quartier. Bim hundertwasserhus hämer au no s’haus der kunst agluegt.

Am nomittag hämer üs ali den wieder bim prater (gnau gno im wurstelprater) troffä. Zun start bini mit de sandra gad uf di erst bahn gangä. Eini wo di i ali richtige trüllt mit bis zu 3g. Eigetli nüt speziells, doch hät de gueti herr s’sehr guet gmeint und d’bahn gad zweimol laufe lo.

Als abschluss im prater simer no ufs rieserad. Damol no innere ganz normale gondle, bi einige isch aber unmissverständlich komuniziert worde, dasses nöchst mol es candlelight – dinner mue si!

Znachtgässä hämer gad bim bahnhof bim italiener. Es restaurant wo gad alles noch dine wünsch frisch zuebereitet worde isch.

Italiener des Tages:
Dä guet 25jöhrig herr wo sich bim z’morge vo sinere fründin bediene und s’brötli mache lot.

Hüt is bitz früähner use gangä (wie erwartet nur für di einte,aber doch für meh als denkt). Mir händs nomel im schloss schönbrun probiert. Für dä weg wo de mäthel gescht innere gfühlte stund zrugg gleit hät, hämer hüt e minute brucht und mir händ direkt ilass is schloss übercho. En bsuech wo sich glohnt hät.
Nochem obligate glüäwy vorem schloss is i d’innestadt gangä. Det hämer üs innes shoppinggrüppli und es naschmarkt grüppli ufteilt und de nochzügler hät sich bereits mol ufem prater umegluegt.

Am drü (also so wärs zumindest plant gsi) hämer üs ali wieder bim hotel troffä zum zämä uf de sylvesterpfad z’go. Nochem start bi de rothusbühni (mitere bänd us paar alternde radiomoderatore wo nöd gmerkt händ dass mer in wien au wür dütsch verstoh) is in hof gangä zu de ö3 bühni.

Det häts diversi,anschinend in östrich bekannti, liveacts gha wie de Julian le Play (oder plae noch de moderatorin) oder d’GuGabriel. So hämer de obig a diverse plätz i de innestadt verbrocht bis am 2 überall fertig gsi isch und mer zrugg is hotel sind. Für di eine no miteme zwüschestopp a de hotelbar!

Wunsch des Tages:
E GUÄTS NEUS!!!